1. 日常嘅家居污漬，牆壁、衣物、食具、傢俬、廚房、浴室黴菌..... 牽涉各種各樣嘅清潔方法，K仔教你點樣除去呢啲污漬。清潔嘅原理有「物理方式」同「化學方式」。
2. 【物理方式】比較適合啲堅硬平面上黐喺表面嘅污漬，係最簡單。主要用「磨砂」嘅原理，用乾布或百潔布加少少水，點啲~$8【砂粉】或者唔使加水直接用~$10【cif, jif】一路捽。對煲底，水龍頭花灑水垢、金屬鐵鏽氧化物、茶漬、燒燶咗嘅鑊、牆壁嘅油污都用得。比較要注意嘅就係唔可以用喺易潔鑊或皮、布上面。如果個污漬面積唔係好大，用牙膏或鹽捽都得。
3.【化學方式】
👉切記：不可混合，不同嘅清潔劑，有機會產生化學反應生成有毒物質
a. 【物以類聚 like dissolves likes】唔溶喺水嘅好多時都係油溶性物質 (例如油漆、膠嘅污漬、蠟筆、油性頭筆、化妝品）用「天拿水」、「白電油」、「洗甲水」整濕佢抹下通常可以整得甩，有時用「酒精」都可以因為酒精可以溶到水溶性及油溶性嘅物質。如果頑固啲就要浸耐啲，例如黐喺衫上面嘅油漆可能要用天拿水浸幾次，浸完之後再用返普通洗衣粉洗就可以。如果係水溶性嘅物質例如咖啡、茶、豉油，喺污染未深入衣物嘅時候用水或水加洗潔精係可以好容易洗走。但係過得耐嘅變咗固體就好難清潔。
b. 【氧化】好多鮮豔顏色嘅染料例如咖啡、果汁、茶，如果用水沖洗完之後仲有啲污漬，可以用【氧化劑 oxidizing agent】，例如【(含氯）漂白水/粉】、【彩漂/過碳酸鈉】+水、【雙氧水】。注意用漂白水嘅時候要留意通風、戴手套同眼罩 (因為漂白水有強烈刺激性)。漂白水對黑/啡色黴菌嘅污漬好有效，如果漂咗好耐都唔得，可能係濃度唔夠高或者啲漂白水黐得唔夠耐。例如牆壁罅嗰啲黴菌，係可以剪咗一條條嘅紙巾整濕咗黐住嗰條罅再滴啲漂白水落去。注意如果件衫係彩色衫就要用「彩漂」。
染料(有色） + [O] → 染料[O] (冇色）
(氧化劑）
👉 漂白水唔可以用喺金屬因為會加速生鏽
c.【酸鹼中和】好多污漬其實係鹼性嘅「金屬氧化物」或「金屬碳酸鹽」，例如廁所個塔嘅污漬(氧化物)、水垢(碳酸鹽)，你用啲酸性嘢就可以清除佢，例如檸檬汁、醋、可樂、檸檬酸、草酸、潔厠得、鏹水 (用潔厠得同響水，必須戴手套同眼罩，滴落皮膚或衣物要立即用大量水沖洗）。
金屬氧化物(固體）+ 酸 → 水溶性鹽 + 水
金屬碳酸鹽(固體）+ 酸 → 水溶性鹽 + 水 + CO2 (其實呢個反應屬於酸鹼中和）
d. 【利用物理作用，將污漬變成可溶於水嘅物質】我哋平時用嘅洗潔精洗衣粉就利用物理作用，將黐喺衣物上嘅油污「乳化 emulsification」 ，將大塊油污化成好細粒嘅「水+油微粒」然後俾水沖走。有啲所謂「唔使用洗衣粉嘅超聲波洗衣機」就係用超聲波將油污震成微粒，再俾水沖走。洗潔精洗衣粉好亦係「表面活化劑 surfactant」，可以降低水嘅「表面張力」令水份容易整濕件衫，帶走污漬。例如我哋玻璃窗表面會黐咗好多死咗昆蟲嘅油漬同蛋白質，畀太陽曬乾咗就好難清潔，都可以用呢啲表面活化劑將佢洗走。
e.【利用化學反應，將污漬變成可溶於水嘅物質】大家都聽過「哥士的 caustic soda」，係好強嘅「鹼性清潔劑」，可以將油污變成番梘同甘油 (稱為皂化作用 saponification)，再畀水沖走。
油 + OH- + 水 → 番梘 + 甘油
如果怕哥士的嘅高腐蝕性，可以用梳打粉呢啲弱嘅鹼性物質，效果當然冇哥士的咁好。用梳打粉嘅時候有時我哋會加啲醋，等佢形成的氣泡幫助清潔。但k仔個人覺得哥士的好用好多倍。
👉 用哥士的必須戴手套同眼罩，滴落皮膚或衣物要立即用大量水沖洗）。
4. 【搞唔掂嘅污漬】用前面嘅方法大部分嘅嘢都可以清潔走，但有一樣非常難搞嘅嘢黐喺衣物係永遠搞唔掂：炭微粒。碳微粒可能係喺屋企外嘅灰塵黐到返嚟 (來自汽車嘅車呔) 黐咗落件衫度係會令到件衫變咗灰黑色，你有乜嘢都整唔到佢走，雖然化學常有啲嘢可以同炭產生反應溶咗啲炭，不過件衫都會溶埋。解決方案就係喺有污漬嘅地方畫個第啲公仔遮咗佢😜。
未提供相片說明。
 
 
 
 

153